Распечатать

Молитва Иосифу Обручнику

К святому Иосифу обращаются с молитвами за помощью в обретении верного спутника в жизни, взаимной любви, семейного счастья и благополучия.

Текст молитвы

 
О святый праведный Иосифе!

Ты еще на земли сый, велие имел еси дерзновение к Сыну Божию, иже благоизволи именовати тя отца Своего, яко обрученика Своея Матери, и послушати тя:

веруем, яко ныне с лики праведных во обителех небесных водворяяся, услышан будеши во всяком твоем прошении к Богу и Спасителю нашему.

Темже, ко твоему покрову и заступлению прибегающе, смиренно молим тя:

якоже сам от бури сумнительных помышлений избавлен был еси, сице избави и нас, волнами смущений и страстей обуреваемых:

якоже ограждал еси Всенепорочную Деву от клеветы человеческия, огради и нас такожде от всякия клеветы напрасныя:

якоже хранил еси от всякого вреда и озлобления воплотившагося Господа, сице сохраняй твоим заступлением Церковь Его Православную и всех нас от всякаго озлобления и вреда.

Веси, святче Божий яко и Сын Божий во днех плоти Своея в телесных потребах нужду имеяши, и ты послужил еси им:

того ради молим тя, и нашим временным нуждам благопоспеши твоим ходатайством, подая нам вся благая, в житии сем потребная.

Изряднее же просим тя, исходатайствуй нам оставление грехов прияти от нареченнаго ти Сына,

Единороднаго же Сына Божия, Господа нашего Иисуса Христа и достойны быти наследия Царства Небеснаго нас предстательством твоим сотвори,

да и мы, в горних селениих с тобою водворяющеся, прославим Единаго Триипостаснаго Бога, Отца и Сына и Святаго Духа, ныне и во веки веков.

Аминь.